Saturday 27 April 2013

اكيد الدنيا هتتزبط

الموضوع المره دي هيكون مختلف شويه علشان الموضوع دا لناس معينه .

كل الي يعرفوني عارفين اني كنت في فتره مكتئب و مكنتش واثق في حد و كنت حتى مش بحب نفسي بس في ناس وقفه جنبي و استحملتني مع اني كنت نكدي اوي بصراحه بس الحمد لله و اقنعوني اني لازم ابطل تشائم و ابدا صفحه جديده و اعرف ناس جديده و اكسب الناس و فعلا بدأت اعمل زي ما قالولي و هما ساعدوني في اني اعرف ناس جديده و كده و فعلا بدأت ابقي مبسوط و بدأت اني اثق في نفسي و احب نفسي و طبعا هما السبب في كل الي انا وصلتلو دلوقتي 

احب اقولكو انكم بجد خلتوني مبسووط بجد من قلبي و خلتوني اثق في نفسي و احب نفسي و بجد بينتولي اني بجد شخصيه كويسه و تتحب  مش زي ما كنت فاكر ان محدش بيطقني 

الموضوع دا لي : ميرنا مجدي -  نور طارق - ناريمان طارق - خالد حفني - اسلام حسن - عمر طارق - رامي حسام - نور كوريم - احمد مدحت - مصطفي عبد 
الخالق - روان اشرف - نادين طارق - نوران طارق - فرح طارق -  ريم سعيد -  ندى اسماعيل  -عبد الرحمن فاروق 

بجد انا مش لاقي كلام اقولو بس بجد شكرا ليكو كلكو و يارب نفضل اصحاب .علطول

Thursday 11 April 2013

ضحكه ببلاش

كان من فتره كده صغيره كانت جاتلي فكره اني اجمع ناس و نبقى كل مهمتنا اننا نساعد الناس الغلابه او اي حد في مصر عموما غني فقير المهم ان تكون مهمتنا اننا نرسم الضحكات علي وش الناس.

الفكره دي جاتلي من اعلان كوكاكولا الي هو اتجنن و طبعا كلنا شفناه، انا كنت شوفته يوم ما نزل علي اليوتيوب و يوميها قعدت اليوم كله بفكر في الموضوع دا و فكرت ف كل حاجه فيه و بما اني بحب اساعد الناس اصلا ف كانت فكره حلوه ليا و كنت كلمت واحده صحبتي في الموضوع و عجبها و يوميها كنت متحمس اوي للفكره و فكرت في تقسيم الناس الي هتخش و في اني اعمل صفحه لينا و موقع كمان و نبقي مجموعه كده كبيره و الفكره تبقي في كل القاهره و بعد كده في المحافظات بردو و ايوه ممكن اكون بالغت شويه ف تفكيري بس انك تحلم دي حاجه مش عيب، بس للاسف انا معرفش ناس كتيره او مليش شعبيه ف كانت اول مشكله وقفت في طريقي اني منين اجيب ناس و كده المهم قولت ممكن اعمل صفحه علي الفيس بوك و اقول فيها فكرتي و لما حد يخش عليها هيقرا فكرتي و لو عجبته ممكن يكلمني بس بردو للاسف فشلت الفكره دي فى انها تجيب ناس ف قولت اعمل اللي عليا و قولت للناس الي اعرفها و في اللى عجبتهم الفكره و قالوا انهم هيكونو معايا و خلتهم يقولو للي يعرفوهم بردو و في كام واحد كلمني فعلا و قالي انا ممكن ادخل معاك و معايه فوق ال30 شخص و بتاع ف طبعا دي حاجه تخليني مبسوط و اتحمس للفكره اكتر ف قولت خلاص يا جماعه احنا نبدأ في الاجازه (كانت اجازة نص السنه الي فاتت) و اني هجمعكو في يوم و ننتفق كلنا علي ايه الي هنعمله و كمان بالمره الكل يعرف بعضه و جت الاجازه لقيت ان كل الناس كانت بتتكلم و خلاص الي قال هيجيب ناس مجبش و في وقت الجد كله بيستعبط اجي اقول للناس طب عايزين نتقابل و نشوف الي يقولي "معلش ماما قفشه عليا مش هعرف انزل" و "معلش مش فاضي عندي خروجات تانيه" و في الاخر معملتش حاجه لحد دلوقتي و طبعا الناس الي كانت بجد معايا في منهم الي افتكر اني بلعب او بهزر او مش واخد الحوار بجد او علشان اتعرف علي ناس و خلاص و الناس نسيته و خلص الحوار علي كده، بس انا بالنسبالي لسه الموضوع مخلصشي و نفسي بجد ابدأ في الموضوع دا علي الاقل ابقى بعمل حاجه مفيده في حياتي بس في ناس كتير بتتكلم بس و مبتعملش بكلامها بس انا مش كده.

علشان كده انا فعلا هعمل الموضوع دا و هنفذ الفكره دي بس المره دي مش هعتمد علي حد و معنديش مانع اني انزل لوحدي اعمل اي حاجه تفرح الناس و الي هيقرا الموضوع دا و عجبه ممكن ببساطه يقولي و يخش معايا بس ياريت تكون ناس فعلا جاده ولاد او بنات سن كبير صغير اي حد المهم تكون ناس واخده الفكره بجد و عموما ده لينك الصفحه وفيه كل حاجه علشان لو اي حد عايز يشترك معايا
twitter acc. : @dahkabblash 
My pin:28389B37
My Email : djcamirony@hotmail.com
شكرا.

Saturday 6 April 2013

احكي و متخفش

طبعا كلنا عارفين ان دلوقتي مبقاش في اصحاب بجد الا نادر و حتي صعب انك تلاقيهم، و في ناس كتير بتكون مضيقه او زعلانه من مشاكل خاصه بيهم و اكيد بيكونو عايزين حد يحكوله علشان يساعدهم او بيكونو منتظرين ان حد يحس بيهم و يحس بي المشاكل الي هما فيها بس بيلاقو ان في ناس تقولهم "معلش" و في الي مثلا تحكيله عن مشكله حصلت مع واحد صحبك ف هو كمان يعملها بس بعد وقت، ف دلوقتي اغلب الناس بتقول ان الاحسن انك متحكيش الي جواك علشان مش هتلاقي الي هيحس بيك مع ان دا في رأي انها حاجه وحشه جدا انك تخبي الي جواك.

انا من زمان مكنتش بلاقي حد اتكلم معاه ف كانت كل مشكلي جوايه و لحد دلوقتي في حاجات كتير جوايه محدش يعرفها علشان انا اتعود من صغري اني مش بحكي حاجه بس النتيجه كانت وجع القلب و خلاص و كل واحد بيخبي الي جواه اكيد هتلاقي قلبه وقعه او مكتئب وانا عارف احساس انك تكون بتخبي الي جواك بتكون حاسس انك لواحدك علطول حتي لو في 100 شخص حوليك بردو بتحس بده و بتكون كده زي الي حابس نفسه في مربع و قاعد فيه مش عارف تخرج منه و ممكن تحس ان دي حاجه كويسه و انك كده احسن من الاول بدل المشاكل و ان كل ما تحكي لحد، الحد دا ممكن في الاخر و يبعد عنك بس العكس انت بتحبس نفسك مش بتستريح من مشكلك.

انا عارف ان دلوقتي بتلاقي ناس كتير ممكن مش تحس بيك بس دي مش حاجه تخليك تخبي الي جواك، انا عارف ان في ناس اندال ممكن تحكلهم و يفضحوك و بردو دا مش يخليك تخبي الي جواك، انا عارف ان في ناس ممكن تبعد عند بعد ما انت تقربهم منك و تقولهم الي جواك بس دا بردو مش يخليك تخبي، قول الي جواك مهما كان ممكن تلاقي الي هيحس بيك و متقولش "لا مش هلاقي" هتلاقي علشان في ناس كتير زيك و ممكن يكونو في نفس مشكلك ف هيكونو عارفين الي انت حاسس بيه علشان هما بردو حاسينه و هتلاقي بردو الي ممكن يسعدك علشان ممكن تلاقي واحد كان في مشكلتك دي و حلها او عرف ازاي تتعامل معاها ف متقولش ان مفيش حد حاسس بيك مش علشان واحد او اثنين او عشره من اصحابك الي قريبين سابوك زمان او انك حكيت لواحد او لعشره و مش حاسين بيك يبقي مفيش حد هيحس بيك، جرب تقول الي جواك و صدقني مش هتتعب اكتر بالعكس هتحس انك في راحه علشان مش شايل في قلبك كتير و صدقني هتلاقي ناس كتير تحس بيك و تسعدك بس خلي عندك ايمان انك هتلاقي و متقولش من واحد ولا اثنين محسوش بيك يبقي كل الناس كده.