"يا عم دي شمال" - شاب مصري

معلش يا جماعه انا بقالي كتير مكنتش بكتب بس كنت مخنوق شويه و كده المهم، دلوقتي يقولك مبقاش اكتر من البنات الشمال و مش عارف ايه و اي بنت دلوقتي لازم تلاقي حد بيتكلم عليها حتي لو هي في قمه الاحترام و من الحاجات الي بجد بتستفزني اني مثلا ابقي واقف مع واحد صحبي يبص كده علي بنت مثلا و يجي "البت دي شمال" و اقوله "طب عرفت منين" يقولي "هو كده" !! ازاي يعني هو كده ! اي بنت ماشيه بقت خلاص شمال ؟ 

انا هقولكو مين الي طلع شمال دي اصلا، الولاد هما الي طلعو كلمت "شمال" في ممكن واحد يصاحب واحده كده منظره او للمتعه ف هي تحبه بجد و بصراحه كده كلنا عارفين ان البنت ضعيفه او مش ضعيفه هي بس لما بتحب بجد ممكن تعمل اي حاجه للشخص الي بتحبه دا ف هو يكون بيمثل عليها الحب و طبعا يعود يقولها "انا بجد بحبك اوي" و شويه "انا حاسس اني بجد عايز احضنك و عايز ابوسك" و طبعا الي بيحب بجد ممكن يعمل اي حاجه لحبيبه ف ممكن تعمل دا معاه و يكون هو اصلا معندوش ولا 1% من الرجوله يقوم رايح لصحابه "شوفتو دا انا حضنت .... و بوستها و بتاع" و طبيعي هيكون اصحابه خدو عنها فكره وحشه ف سموها "شمال" ف الولاد اصلا هما الي طلعو الاسم دا علشان هما مش رجاله او عندهم نقص في الرجوليه و انا ولد و مش بقول ان كل الولاد كده بس اغلبهم كده.

برضو من الغلط انك تحكم علي اي حد من قبل ما تعرفه و حتي انك تحكم عليه من اول مره تكلمه فيها او تقبله فيها علشان اغلب الناس دلوقتي بقت تفهم الناس الي قدمها غلط و الولاد هما بردو اكتر ناس ممكن تفهم غلط يعني البنت مثلا تكون بتحب تهزر و تتعرف علي ناس جديده في ولاد كتيره ممكن يقولو عليها شمال  و حتي لو كانت محترمه و مش بتحب تكلم ولاد تبقي معقده او تنكه ف انا نفسي افهم يعني البنت تعمل ايه علشان محدش يقول عليها حاجه .

افهمو بقى مش اي بنت لبسه بنطلون ديق تبقي شمال، مش اي وحده يتتعود علي الناس بسرعه و بتحب تهزر تبقي شمال، مش اي واحده بتحبك و علشان وفقت انك تعمل معاها حاجه تقول عليها شمال انت الي انسان زباله، مش اي واحده محترمه و مش بتكلم ولاد تبقي معقده او تنكه، بطل تحكم علي الناس من غير ما تكون عارفهم، بطل تحكم علي الناس من اول مره تشوفهم او تكلمهم، اعرفهم الاول كويس و بعدين احكم علشان لما حد يجي يسألك "عرفت منين؟" تعرف تجاوب.

فكرو شويه قبل ما تحكمو علي حد و نظف دماغك مش علي طول تفكر ان البنت دي شمال فكر في ان البنت دي ممكن تكون محترمه بس دماغك الزباله هي الي خلتها وحشه و كمان ممكن يكون عندك اخت انت تقول علي وحده شمال بكره يتقال علي اختك شمال ف ليه ؟

بعتذر لو في حاجات مكنش ينفع اقولها بس انا بقول الي انا شيفه و الي بيحصل فعلا

Best 3 short films i ever seen.

I hope you like them, enjoy.

Thanks for watching..  leave your comment.
 

احلم و حقق حلمك

في ناس كتير بتحلم و بيكون نفسها ف حاجات كتيره بس بيكون في مشاكل كتير وقفه في طرقنا زيي انا، انا نفسي اكون "دي جاي" و الموضوع دا بقالو اكتر من 3 سنين و عادي نفسي و حلم ليه علشان انا بحب دا و لحد دلوقتي انا بردو نفسي و بحاول اعمل اي حاجه علشان احققو بس لسه مش عارف علشان عندي مشاكل مع اهلي و كمان مشكله في الفلوس و كده.

كل واحد فينا عندو حلم و نفسه في حاجه في النفسه يبقى مصور و في الي بيحب الرقص و في النفسه انه يرسم و يخلي الناس تشوف الرسم بتاعه و في ....... و في ...... ، بس في مشاكل كتيير بتقف ادمنا زي في ناس مش معاها فلوس علشان تشتري كاميره و واحد زيي انا معيش فلوس علشان اقدر اشتري العده و في الاهله مش حبين الموضوع ف مش بيساعدوه، و كتير من الاهالي كده علشان هما كل الي شيفينه الدراسه و الكليه الكليه و طز في احلامك او انت نفسك تكون ايه او نفسك تعمل ايه و انا عارف ان طبعا المستقبل اهم حاجه و انا معاك انا فعلا عايز اكون مهندس بس مفهاش حاجه لما تاخذ الحلم بتاعك علي اساس هوايه تعملها بجانب درستك و مستقبلك بس المهم انك تحاول تحقق حلمك و لو اهلك وقفين ادامك عادي حاول بردو تعمل الي انت بتحبه.

و زي ما اتكلمت عن الاصحاب بردو الاصحاب ممكن يأثرو جامد في الموضيع دي يعني مثلا لو معكش فلوس ممكن يسعدوك و اقل حاجه ممكن يعملو معاك جمعيه من غير ما هما يكونو محتجين بس دا علشانك كوسيله ممكن تجبلك فلوس كتير بسرعه و تكون عملت الي انت بتحبه و نفسك فيه و ممكن بردو يشوفو لو يعرفو حد مثلا ممكن يساعدك وزي مثلا في الموضوع بتاعي لو حد يعرف "دي جاي" ممكن يقولو يعلمني مثلا حاجات او كده بس اقولكو حاجه دلوقتي مبقاش في حد بيفكر بالشكل دا لغيره و حتي الناس بقت تستبعد ان حد من اصحبهم هيساعدوهم اصلا حتي لما كنت قاعد مع واحد صاحبي و بحكيله قالي " يا ابني انا هقولك حاجه دلوقتي الي بقا يعتمد علي الناس يبقى ......" ف ليه بقينا كده.

بص حلمك خليك وراه اوعي تسيبه و متقولش "ياعم انا كل حاجه وقفه ضدي و مفيش اي فايده من الى بعمله دا بقى حلم بس" لا دا مش حلم و بس مفيش حاجه مستحيله لو انت عايز تعمل اي حاجه هتعملها بس يكون عندك امل و صبر و متزهقش من المحاوله علشان تحقق حلمك و كمان نصيحه ابقا واحد بيحب اصحابه ميكنش كل الي بينكم مدرسه او قهوه او اي حاجه كون واحد بيفكر في اصحابه ازاي يخليهم يحققوا حلمهم و يكونوا مبسوطين كون واحد بيساعد اصحابه و اكيد هتلقي بردو الى فكر بنفس الطريقه بس ليك بس ابدا انت من نفسك علشان تخلي الناس تفكر كده بردو مينفعش تقول" طب ما هما مش بيفكرو كدا ايه الي هيخليني انا كده" علشان لازم واحد يبدا بده و لو حتي هما مفكروش ياعم كفايه انك هتكون شخص محبوب و صاحب بجد و فاهم يعني معني الصحوبيه، صدقني ساعد اصحابك علشان كلنا نفسنا في حد يبقي جمبنا في اي حاجه بنعملها او نفسنا فيها.

انت صاحبي بجد ولا مصلحه ؟

دلوقتي بقا في ناس كتير تكون مهمومه و مخنوقه تسألها من ايه تقولك " اصل بجد في ناس تكون معاهم كويس و في الاخر يطلعوا ميستاهلوش اي حاجه" و فعلا انا واحد منهم مجرب كتير انى اكون طيب مع كل الناس و انا طبعتي بحب اساعد الناس في مشاكلهم ف يعني الي كنت بشوفو عندي مثلا علي البي بي ام او تويتر زعلان او مخنوق كنت بحاول اتكلم معاه و احاول اساعده حتي لو ناس انا معرفهاش بس في الاخر كنت بلاقي ان بعد كل دا الناس دي بتسبني و ولا تسأل و من غير اي سبب ف دا فعلا من الاسباب ألي كانت بتخليني مخنوق.

و بردو تلاقي ناس تقولك انا صحبك و بتاع و تلاقيها ولا بتسأل و لما يكون في وقت زنقه تلاقيه يبعد عنك و في الاثنين يكونو صحاب و يسيبو بعض علشان حورات ملهاش اي لزمه و في.... و في....، الصحاب الي هما مفروض بيكملو بعض يعني لما تكون في مشكله هتلاقيهم اول ناس جنبك، لما تكون مريض اول ناس هتسأل عليك ، لما تكون في خروجه و معكش فلوس هما يشلوك، من الاخر الصحاب هما الناس الي بتسأل عليك و تحترمك و من غير اي مقابل ولا في بينهم فلوس ولا مصالح ولا اي حاجه و دول الصحاب اللى بجد في نظري.

نيجي بقا للناس ألي بتصاحب مصلحه و كده ممكن تقولي انت ايه رأيك لما يكون كل اصحابك وخدينك للمصلحه بس ؟ ليه اصلا تصاحب ناس للمصلحه و خلاص ؟ انا عارف ان كلو بيتكلم علي كلو انا نفسي مش كامل ساعات بتكلم في ضهر ناس بس ليه ؟ قالك ان الدنيا كما تدين تدان ف ممكن تقلولي فيها ايه لما تعامل الناس كلها علي انها اصحابك بجد و انها عمرها ما هتتخلا عنك و انا عارف في ناس تقولك " بس الواد دا انا مش بحبو بحسوه انو فقيع" بس لا حاول تشوف الناس من الجانب الحلو فيها يعني في واحد ممكن يكون بيحبك جدا بس انت شايف انو فقيع حاول تقرب منه صدقني ممكن تلاقيه شايفك حاجه كبيره اوي ممكن يكون شايف فيك ميزه انت مش واخد بالك منها و كل واحد في اي حلم ليه بيبقي محتاج حد يقف وراه و يدعمه ممكن يكون هو دا الشخص ألي هيفضل وراك لحد الاخر ف شوف الناس من الجانب الحلو الي فيها،

و زي نصيحه خد بالك من الناس ألي بجد طيبه مش شايله في قلبها اي حقد او كراهيه ، اكيد كل واحد يعرف ناس كتير طيبين و الي هما دلوقتي بقا يتقال عليهم " مغفلين" و دا بس علشان هو بيتعامل بنيه صافيه معاك مع ان بجد لو كل الناس اتعملت  بنيه صافيه مش هيبقي في اي كراهيه و الناس هتحب بعض ف حاول تحب كل الناس، انسى الناس الي سابتك و ابدأ صفحه جديده مع نفسك و مع الناس و خلي نيتك كده صافيه مع الكل انا عارف انت ممكن تتعب في الوقت دا بما انك طيب بس صدقني هتكون عند نفسك علي الاقل واحد صافي اللي في قلبه للناس.

و انا عارف ان ممكن يكون الموضوع ملخبط شويه بس انا مش كاتب انا بس بقول الي جوايه و الي عايز اوصله للناس علشان انا بحلم، بحلم بناس بتحب بعض بجد من غير اي مقابل.

هههه ايه يا عم الشيخ !

من الحاجات البرضو بعض الناس بتتريق عليها او يعني الناس الي في سننا، الواحد الي يكون بيصلي، لو مثلا و انت قاعد علي القهوه مع اصحابك و قلت لهم تعالو نصلي العشاء مثلا لازم تسمع الي بيقولك " ههههه ايه يا عم الشيخ انت بتصلي اصلا "، الناس دي بتحسسني ان الي بيصلي ده يبقي مش زي باقي البشر و مش روش بقا و كده مع ان الصلا دي بجد حاجه جميله جدا و بصوا انا هتكلم عن نفسي انا في الاول مكنتش بصلي خالص و طبعا ياما ماماتي و اخواتي الكبار نصحوني اني اصلي كتيير بس انا فعلا كنت بكسل و بصراحه كنت شايف انها مش حاجه جمده اوي الهو بقا مش هتأثر فيا و تخليني كويس بقا و كده بس حوالي من شهر والدي كان طلعنا عمره و انا قولت اني اصلي و التزم في العمره بقا دي عمره يعني و المهم التزمت فعلا و كنت بصلي كل وقت بوقته و لقيت ان الصلاه بجد بتأثر انا كان عندي مشاكل كتير و اغلب الناس كانت بتقول عليا كئيب و فعلا انا كنت كده بس بعد ما بدأت اصلي بجد فرق في حالتي النفسيه كتير بقيت مبسوط و بضحك مع الناس و اهلي بقوا راضيين عني و الناس بقت تحبني و تحب تتكلم معايه مش زي الاول نادر ما كان حد بيتكلم معايه علي اساس اني مش مضحك بقا و كده بس دلوقتي بجد انا بقيت محبوب و مضحك و ناس كتير قلتلي اني مسخره و بضحك اوي و دا كان تجربتي انا.

اقولك بقا حاجه ليك او ليكي انا عارف ان كولنا من جوه نفسنا نتصلح و نقرب من ربنا بس انا برضوا عارف ان ساعات بنكون مكسلين نصلي و نقول حاضر هقوم بعد شويه و نكبر و مثلا لو في خروجه او في مشوار مش بناخد بلنا اصلا ان في صلاه و كده، بص المهم انك تصلي و اقولك علي حاجات كتير ممكن تسهلك الموضوع يعني مثلا مفهاش حاجه لو انت قعد في البيت وقت العصر تنزل تصلي او حتي تصلي في البيت و مش تكسل كده كده انا عارف اننا ما شاء الله مش  بنذاكر و عندنا وقت فاضي بالهبل و اقولك حاجه لو انت مهموم و بجد في حاجات كتير مخلياك مخنوق من الدنيه صلي و شوف.

اكيد كل واحد الصلي هتأثر معاه في حاجه ممكن انا مكنش عارف هتأثر معاه في ايه بس اقولكو اتفاق رجاله جرب اسبوع واحد بس تلتزم فيه في الصلى و يبقي بجد لربنا و شوف الصلاه هتأثر معاك في ايه لو مش أثرت معاك ارجع تاني مش تصلي.

و انا عن نفسي شايف ان الواحد مهما بيعمل حاجات غلط بردو يصلي و ياعم اعمل كل حاجه غلط بس ادي الصلى حقها و الفاهم ان دا كلام غلط انا هقولك الفكره، الفكره انك لما تصلى و تقرب من ربنا، ربنا هيحميك و هيبعد عنك الحرام ف هتلاقي نفسك لوحدك بتتصلح بس.

ببساطه انا ليه بكتب هنا

انا ولد عادي قربت علي 18 سنه، و زي اي شخص بحلم، بحلم بحاجات كتيره هتعرفوها مع الوقت بس المشكله ان دلوقتي اي حد بيقول حاجه نفسه يعملها او كبيره الناس بتتريق عليه و يقلولك:" ههههههه انت بتحلم يعم ايه الي انت عايز تعمله دا، دا تفاهه و كلام فاضي" و لما تيجي مثلا تقلهم مثال لواحد فكر ف حاجه و عملها فعلا و خطوه بخطوه يقلولك:" و انت هتقارن نفسك بدا انت عبيط يابني" و انا فعلا عندي ناس كتيير اوي كانت بتقولي كده، بس انا نفسي في حد يسمعني او يبقي ليا صوت، حد يفهمني و ناس تعرف قيمتي و يبقا في ناس بتشجعني مش زي اصحابي اكتر حاجه عملوها اتريقوا و ضحكوا، انا بكتب هنا عشان اوصل افكاري لواحد او حتي اثنين و ممكن اي حد يقرا كلامي اكيد في المش هيعجبه كلامي بس كفايه عندي اني لقيت طريقه اقدر يبقى ليه صوت و ابقى راضى عن ألي انا بعمله و بكتبه .